"_ 2009 წლის გაზაფხულის აქციების წარუმატებლობის მიზეზთა დასადგენად, უპირველესად, აუცილებელია იმ ფსევდო-ოპოზიციური პარტიების ლუსტრაცია, რომლებიც ფარულად თანამშრომლობენ საქართველოს ამჟამინდელ ხელისუფლებასთან.

თუ კარგად დავაკვირდებით, იმ მომენტში, როდესაც რეალურად სუსტდება ხელისუფლების პოზიციები და მოსახლეობისთვის სასიკეთო ცვლილებები იწყება, ეს პარტიები ერევიან საქმეში და სიტუაციას აუარესებენ. გაზაფხულის მოვლენების გაანალიზებისას და დამნაშავეთა ძიებისას, მხოლოდ სააკაშვილზე არ  უნდა ვისაუბროთ. რეალურად, სააკაშვილი არაფერს არ წარმოადგენს: მან საქართველო მთლიანად რუსებს გადააბარა; თავად კი არა მარტო კრემლის, არამედ ე.წ. "ნაციონალების" სახელისუფლებო კლანის დაკვეთებს ასრულებს. ამავე კლანის ინსტრუქციებს ახორციელებენ რიგი პოლიტიკოსებისა და მას-მედიის საშუალებებისა. სანამ არ მოხდება მათი ლუსტრაცია, სანამ ყველას და ყველაფერს თავისი ნამდვილი სახელი არ დაერქმევა, ვერ შევძლებთ სამომავლო მოქმედებისთვის ეფექტური გზებისა და გეგმების დასახვას,"_ განაცხადა "საქართველოს მწვანეთა პარტიის" ლიდერმა, გიორგი გაჩეჩილაძემ 25 დეკემბერს სასტუმრო "რედისონში" გამართულ კონფერენციაზე.

შეხვედრა, სახელწოდებით "გაზაფხულის პროტესტი: შეცდომები-შედეგები", ჟურნალისტთა კავშირ "ობიექტივის" ინიციატივით მოეწყო. კონფერენციაში მონაწილეობა მიიღეს ოპოზიციური პარტიების წარმომადგენლებმა, ექსპერტებმა და ჟურნალისტებმა.